ਵਿਸ਼ਵ-ਵਤਨ ਜਿਸ ਦਾ ਨਾਉ ਬੇਗ਼ਮਪੁਰਾ ਹੈ, ਪਰਮ ਅਨੰਦ ਨਾਲ ਭਰਪੂਰ ਹੈ। ਇਸ ਵਤਨ ਦਾ ਮਨੁੱਖ ਸਮਾਜਕ, ਸਦਾਚਾਰਕ, ਵਿਦਿਅਕ, ਧਾਰਮਕ ਆਦਿ ਹਰ ਕਿਸਮ ਦੇ ਦੁੱਖ ਤੋਂ ਮੁਕਤ ਹੈ ਅਤੇ ਨਾਲ ਹੀ ਚਿੰਤਾ ਅਤੇ ਘਬਰਾਹਟ ਤੋਂ ਮੁਕਤ ਹੈ। ਵਿਸ਼ਵ ਦਾ ਮਨੁਖ ਮਾਨਸਿਕ ਤੌਰ ਤੇ ਸੁਤੰਤਰ ਹੈ। ਮਨੁੱਖ ਨੂੰ ਕਰ ਦੇਣ ਦੀ ਘਬਰਾਹਟ ਨਹੀਂ ਅਤੇ ਨਾ ਹੀ ਕੋਈ ਰਾਜਾ ਦੂਜੇ ਰਾਜੇ ਨੂੰ ਅਧੀਨਗੀ ਕਰ (ਖਿਰਾਜ) ਦੇਣ ਦੀ ਚਿੰਤਾ ਵਿੱਚ ਹੈ। ਭਾਵ ਇਸ ਪਾਤਸ਼ਾਹੀ ਵਿੱਚ (ਸਦੀਵੀ ਪਾਤਸ਼ਾਹ ਤੋਂ ਬਿਨਾਂ) ਕੋਈ ਰਾਜਾ ਹੀ ਨਹੀਂ ਹੈ। ਇਹ ਸਾਮੰਤੀ-ਯੁਗ ਦਾ ਖਾਤਮਾ ਹੈ। ਇਸ ਕਾਰਣ ਕਿਸੇ ਦੀ ਕੋਈ ਜੱਦੀ ਜਾਂ ਨਿੱਜੀ ਜਾਇਦਾਦ ਨਹੀਂ ਹੈ। ਇਥੋਂ ਦਾ ਸ਼ਹਿਰੀ ਆਰਥਕ ਤੌਰ ਤੇ ਸੁਤੰਤਰ ਹੈ। ਇਹ ਸਮਾਜਵਾਦੀ ਲੋਕਤੰਤਰ ਯੁਗ ਹੈ। ਸੋ ਰਾਜਿਆਂ ਦੇ ਜ਼ੁਲਮਾਂ ਦਾ ਡਰ ਨਹੀਂ ਹੈ, ਆਪਸੀ ਵੈਰ-ਵਿਰੋਧ ਨਹੀਂ। ਇਸ ਵਤਨ ਦਾ ਸ਼ਹਿਰੀ ਨਿਰਭਉ ਅਤੇ ਨਿਰਵੈਰ ਹੈ, ਇਥੋਂ ਤੱਕ ਕਿ ਇੱਛਾਵਾਂ ਤੇ ਕਾਬੂ ਹੋਣ ਕਰਕੇ ਕਿਸੇ ਵੀ ਕਿਸਮ ਦੀ ਅਵਉੱਨਤੀ ਦਾ ਡਰ ਨਹੀਂ ਹੈ। ਇਸ ਤਰ੍ਹਾਂ ਇਥੇ ਦਾ ਸ਼ਹਿਰੀ ਰਾਜਨੀਤਕ ਤੌਰ ਤੇ ਸੁਤੰਤਰ ਹੈ। ਸਿੱਟੇ ਵਜੋਂ ਵਿਸ਼ਵ ਵਤਨ ਹਰ ਪੱਖੋਂ ਪਰਮ ਅਨੰਦ ਨਾਲ ਭਰਪੂਰ ਹੈ॥੧॥

ਹੇ ਮੇਰੇ ਭਾਈ! ਹੁਣ ਮੈਂ ਅਜਿਹੇ ਉੱਤਮ ਵਤਨ ਦਾ ਸ਼ਹਿਰੀ ਹਾਂ, ਜਿਥੇ ਹਰ ਤਰ੍ਹਾਂ ਦਾ, ਹਰ ਪੱਖੋਂ ਉੱਤਮ ਸੁੱਖ ਹੈ, ਸਦੀਵੀ ਪਰਮ ਆਨੰਦ ਹੈ। ਸੋ ਇਹ ਵਿਸ਼ਵ-ਮਾਨਵਵਾਦੀ ਵਤਨ ਹੈ ਜਿਥੇ ਪਾਤਸ਼ਾਹ ਅਤੇ ਪਰਜਾ ਦਾ ਰਿਸ਼ਤਾ ਸਦੀਵੀ ਸੁਖ, ਅਨੰਦ ਅਤੇ ਪਿਆਰ ਵਾਲਾ ਹੈ॥੧॥ ਰਹਾਉ॥
ਇਹ ਸਥਿਰ, ਅਟੱਲ ਅਤੇ ਸੀਮਾ-ਰਹਿਤ ਸਦੀਵੀ ਪਾਤਸ਼ਾਹੀ ਹੈ। ਇਹ ਰੂਹਾਨੀ ਵਿਸ਼ਵ-ਵਤਨ ਸਦਾ ਤੋਂ ਹੀ ਪ੍ਰਸਿੱਧ ਹੈ। ਇਸ ਦੇ ਸ਼ਹਿਰੀ ਦੂਜੇ, ਤੀਜੇ ਦਰਜੇ ਦੇ ਨਹੀਂ ਹਨ; ਉਨ੍ਹਾਂ ਦੇ ਹਰ ਪੱਖੋਂ ਹਰ ਖੇਤਰ ਵਿਚ ਬਰਾਬਰੀ ਵਾਲੇ ਅਧਿਕਾਰ ਹਨ ਉਹ ਸਦਾਚਾਰਕ ਅਤੇ ਆਤਮਕ ਸ਼ਕਤੀ ਵਿੱਚ ਭਰਪੂਰ, ਸੂਝ-ਬੂਝ ਅਤੇ ਸਬਰ-ਸੰਤੋਖ ਵਾਲੇ, ਹਰ ਪੱਖੋਂ ਸੰਤੁਸ਼ਟ ਹਨ। ਇਸ ਤਰ੍ਹਾਂ ਇਥੇ ਤਾਨਾਸ਼ਾਹੀ ਨਹੀਂ ਹੈ। ਇਹ ਵਿਸ਼ਵ ਸਰਕਾਰ (World Government) ਨਿਆਂ, ਬਰਾਬਰੀ ਅਤੇ ਪਿਆਰ ਵਿਚੋਂ ਜਨਮੀ ਹੈ, ਜਿਸ ਦਾ ਭਾਈਚਾਰਾ ਸੂਝ-ਬੂਝ, ਸਬਰ-ਸੰਤੋਖ, ਨਿਰਭਉ, ਨਿਰਵੈਰ, ਸਦਾਚਾਰਕ ਅਤੇ ਆਤਮਕ ਸ਼ਕਤੀ ਸੰਪੰਨ ਹੈ॥੨॥
ਬੇਗ਼ਮਪੁਰਾ ਦੇ ਵਾਸੀ ਜਿਵੇਂ ਵੀ ਉਹ ਚਹੁਣ ਅਨੰਦ ਨਾਲ ਹਰ ਥਾਂ ਟਹਿਲਦੇ ਫਿਰਦੇ ਹਨ। ਘੁੰਮਣ ਫਿਰਨ ਦੀ ਆਜ਼ਾਦੀ ਹੈ (Freedom of Movement) ਮਹਿਲਾਂ ਦੇ ਪੂਰਨ ਭੇਤੀ ਵੀ ਉਨ੍ਹਾਂ ਨੂੰ ਨਹੀਂ ਰੋਕਦੇ। ਭਾਵ ਪਰਜਾ, ਪਾਤਸ਼ਾਹ ਦੇ ਹਰ ਭੇਦ ਤੋਂ ਜਾਣੂ ਹੈ। ਪਾਤਸ਼ਾਹ ਅਤੇ ਪਰਜਾ ਦੇ ਪਰਸਪਰ ਸੰਬੰਧ ਡੂੰਘੇ ਵਿਸ਼ਵਾਸ਼ ਅਤੇ ਪ੍ਰੇਮ ਤੇ ਟਿਕੇ ਹੋਏ ਹਨ। ਇਸ ਵਤਨ ਦੇ ਵਾਸੀ ਚਮਾਰ ਰਵਿਦਾਸ ‘ਖਾਲਸਾ’ ਫਰਮਾਉਂਦੇ ਹਨ ਕਿ ਜੋ ਵੀ ਇਸ ਵਿਸ਼ਵ-ਵਤਨ ਦਾ ਸ਼ਹਿਰੀ ਹੈ, ਓਹੋ ਹੀ ਸਾਡਾ ਮਿੱਤਰ ਹੈ, ਭਾਵ ਸਮੁੱਚਾ ਵਿਸ਼ਵ ਸਮਾਜ ਮਿੱਤਰਤਾ ਵਿੱਚ ਬੱਝਾ ਹੋਇਆ ਹੈ, ਵਿਸ਼ਵ ਭਾਈਚਾਰੇ ਦਾ ਆਧਾਰ ਕੇਵਲ ਤੇ ਕੇਵਲ ਆਪਸੀ ਪਿਆਰ ਹੀ ਹੈ॥੩॥
ਇਹੋ ਹੀ ਵਿਸ਼ਵ ਸਰਕਾਰ ਜਾਂ ਵਿਸ਼ਵ-ਖਾਲਸਾ ਰਾਜ ਦਾ ਆਧਾਰ ਹੈ ਅਤੇ ਇਹੋ ਹੀ ‘ਬੇਗ਼ਮਪੁਰਾ’ ਹੈ।